ဟိုက္ကူ (ခေါ်) ဟိုက်ကူ အစ

ဟိုက္ကူ (ခေါ်) ဟိုက်ကူ သည် နှစ်ပေါင်း ၁၀၀၀ ကျော်က ပေါ်ပေါက်ခဲ့သော ဂျပန်ကဗျာ ဖြစ်ပါသည်။ ဟိုက်ကူသည် မရှည်လျားပဲ သိပ်သိပ်သည်းသည်း ကျစ်ကျစ်လျစ်လျစ် ဖွဲ့ ဆိုထားသော ကဗျာတစ်မျိုးဖြစ်သည်။ ၎င်းကဗျာတွင် ပါဝင်သော စာကြောင်းရေတိုင်းတွင် ဒဿနိကဆန်သော အတွေးအခေါ်များကို ထည့်သွင်း ဖော်ညွှန်းထားသည်။ တနည်းဖြင့်ဆိုရသော် စာတစ်လုံးချင်းသည် အဓိပ္ပာယ် များစွာနှင့်ညီမျှသည်။

ခေတ်ကာလများပြောင်းလဲလာသည်နှင့်အမျှ ဟိုက်ကူကဗျာသည်လည်း ခေတ်အလိုက် ပုံစံအမျိုးမျိုး မူအမျိုးမျိုး ပြောင်းလဲလာခဲ့လေသည်။
(၁၇)ရာစုမှာ Taiko(တာအိကို) အမည်ရှိသော နယ်လှည့်ကဗျာဆရာတစ်ယောက်က အောက်ပါ ဟိုက်ကူတစ်ပုဒ်ကို မည်သို့ သီကုံးဖွဲ့ နွဲ့ ခဲ့သည်ကို တစ်စေ့တစ်စောင်းလေ့လာကြည့်ပါ။

My House burnt down
Now I am better able
To see the rising moon

အိမ်မီးလောင်ပြီးမှာ
ငွေလမင်းကို ထင်ရှားစွာ
မြင်ရတော့သည်သာ

အိမ်မီးလောင်ပြီးနောက်မှာမှ ငွေလမင်းကို ထင်ရှားစွာ မြင်ရတော့သည် ဆိုတဲ့ အထက်ပါ ကဗျာငယ်သည် ကာရံမဲ့သော်လည်း အသေအချာ စမ်းစစ်ကြည့်ပါက ၎င်းကဗျာသည် အသံ (၁၇) သံပေါက် ဟိုက်ကူ ကာရံမဲ့ကဗျာများပေါ်ထွန်းခဲ့ကြောင်း သိစေခဲ့ပါသည်။  ကျွမ်းကျင်သော ပုဂ္ဂိုလ်များဆိုလျှင် ယင်းကဗျာက ဖော်ညွှန်းနေသည့် နက်နဲသော အဓိပ္ပာယ်ကိုလည်း ကောက်ယူနိုင်ကြပါသည်။
ဂျပန်ဟိုက်ကူတွေမှာ ၅-၇-၅ oဏ္ဏ ၁၇ လုံး သုံးပေမယ့် အနောက်တိုင်း အမေရိကန် ဟိုက်ကူတွေမှာတော့ ဂျပန်ဟိုက်ကူနဲ့ တစ်နည်းတစ်ဖုံကွဲသွားသည်။

”စာကြောင်းတစ်ကြောင်း တိုလည်းတို၊ ချိုလည်းချို၊ ရုတ်တရက် စိတ်ကူးခုန်ထွက်တာဆိုရင် ဟိုက္ကူ (ဟိုက်ကူ)တစ်မျိုးပဲ။ လွတ်လည်း အလွန်လွတ်လပ် ပျော်လည်း ပျော်စရာ။ သင့်ကို တအံ့တသြဖြစ်အောင်လည်း လုပ်သပေါ့။ စိတ်ဟာ သစ်ကိုင်းကနေ ငှက်ဆီကို အလိုလို ခုန်သွားစေတာမျိုးပေါ့”

ဂျပန်နိုင်ငံမှ အစပြုခဲ့သောဟိုက်ကူမှသည် အနောက်တိုင်းက ဟိုက်ကူ၊ အမေရိကန်ဟိုက်ကူများ၊ ဓမ္မ ဟိုက်ကူများ၊ ကယ်ရိုးဝက်(ခ်)ရေးတဲ့ (Desolation Pops)အထီးကျန်ဟိုက်ကူများ နဲ့ (Beat Generation Haikus) ဘိခေတ်ဟိုက်ကူများ အစရှိသဖြင့် ဟိုက်ကူပုံစံများစွာပေါ်ပေါက်ခဲ့ပါတယ်။

ဆရာတာရဲ့ဟိုက္ကူကဗျာပါတဲ့ စာအုပ်ဖတ်ရပြီးသည့်နောက်တွင် ကျွန်မမှာ စားလည်းဟိုက်ကူ၊ သွားလည်း ဟိုက်ကူ၊ အိပ်လည်း ဟိုက်ကူ ဖြစ်နေမိသည်။
ဟိုက်ကူနဲ့ ပက်သက်သမျှ လေ့လာချင်လိုသည့်အတွက် မွှေနောက်ရှာဖွေကြည့်ရာ တခါကဖတ်ခဲ့ဖူးသည့် Top English Magazine အဟောင်းများကို ပြန်လှန်လော ရှာကြည့်မိပါသည်။ Top Magazine ရဲ့မတ်လ 1995 စာစောင်ဟောင်းထဲမှာ ဟိုက်ကူအကြောင်းနှင့် ဟိုက်ကူသဒ္ဒါအကြောင်းရေးထားသည်ကို ၀မ်းသာအားရ ပြန်ရှာလို့ တွေ့ ပါတယ်။စာအုပ်ဆိုင်ဟောင်းများထံမှ ၀ယ်ခဲ့မိတဲ့ ဒီမဂ္ဂဇင်းဟောင်းလေးက ၀ယ်လို့ မလွယ်တော့တာမို့  ပြန်ရှာလို့ တွေ့ တာ အရမ်းတန်ဖိုး ရှိပါတယ်။
အချိန်မရလို့  ဟိုက်ကူအစ တချို့ တလေလောက်သာ စာအုပ်နှစ်အုပ်မှ ပေါင်းပြီး သင်တော်ရာ ရေးပြီးတင်ပေးလိုက်ပါတယ်။ မဂ္ဂဇင်းအဟောင်းထဲမှ တန်ဖိုးရှိတဲ့ အင်္ဂလိပ် Grammar ပုံစံဖြင့် စနစ်တကျ ဟိုက်ကူရေးစပ်နည်းအကြောင်း နောက်နေ့  ဆက်တင်ပေးပါ့မယ်။

စာညွှန်း။      ။ ကိုတာ- နေရောင်အောက်က ကဗျာများ
Top English Magazine ( March-1995)

မှတ်ချက်။     ။ လွန်ခဲ့သော ၁၄ နှစ်ခန့် က Top Magazine ထဲတွင် Haiku
ကဗျာကို ဟိုက်ကူ ကဗျာဟု ရေးသားပါသည်။
ကိုတာ ရဲ့နေရောင်အောက်က ကဗျာများထဲတွင် ဟိုက္ကူ ဟု
သုံးနှုန်းထားပါသည်။

အထက်ပါ ဟိုက်ကူကဗျာများနဲ့ ပက်သက်လို့ ဟိုက်ကူကဗျာအတွက် မသိသေးသည်များ ကျွန်မ၏အလွဲများအတွက် ထပ်မံသင်ယူလိုပါသဖြင့် တစ်ခုခု ရေးပေးပါလျှင် ၀မ်းမြောက်ဝမ်းသာကြိုဆိုနေပါသည်ရှင့်။

ယောနိသောမနသီကာရ
လေးစားလျှက်
မြလေးသျှင်

Advertisements