ဆက်သောက်မှာလား သွန်ပစ်မှာလား


ဒီနေ့ 
ကွန်ပြူတာကြည့်ရင်း ရေနွေးကြမ်းသောက်နေတုန်း ရေနွေးခွက်ကို အောက်ချထားမိပါတယ်.

ပြန်သောက်မယ်လုပ်လိုက်တော့ ရေနွေးခွက်ထဲ ပုရွတ်ဆိတ်တစ်ကောင် တန်းဝင်နေတာ တွေလိုက်ရပါတယ်..

ငါသောက်မယ့်ခွက်ထဲကို ဘာလို့ ဒိုင်ပင်ထိုးပြီး လာသောက်တာလဲလို့ ရန်မတွေ့ ဖြစ်..

သူက ကိုယ့်ထက်နားမလည် နိမ့်ကျတဲ့ တိရိစ္ဆာန်လေ…ပြောလို့ လည်း ပြီးမှာမဟုတ်

သကောင့်သားက သေလား မသေလားလည်း မသိ … ငြိမ်တော့ငြိမ်နေသည်။

ခွက်ထဲမှာလည်း ပဟေဠိ ဆန်ဆန် ရေနွေး တစ်ဝက်တိတိ ကျန်နေသေးသည်။

ကြားဖူးနေကြ အကောင်းမြင်နဲ့ အဆိုးမြင်တို့ အိုင်ဒီယာ လုပွဲကြီးလို

ခွက်ထဲမှာ ရေတစ်ဝက်ပဲရှိတာကို မြင်တဲ့အကြောင်းအရာအပေါ်

အကောင်းမြင်သူက ရေတစ်ဝက်ပြည့်နေတာပဲ အားတက်ပြီး ပြောချင်ပြောနိုင်သည်။

အဆိုးမြင်သူက ရေတစ်ဝက်လျော့နေတာပဲ ဆိုပြီး မြင်နိုင်တာတွေ ခဏထား…

ကျန်နေသေးတဲ့ ရေနွေးတစ်ဝက်က နှမျောစရာကောင်းပေမယ့်

ဒီအကောင်ကြောင့် ဆက်သောက်ဖို့ ဆိုတာက လုံးဝမဖြစ်နိုင်

ပုရွတ်ဆိတ်စားရင် မျက်လုံးပြူးတယ် ဆိုတဲ့ ပြောစကားတွေကြောင့်လည်း နားမ၀င်နိုင်..
(ကိုယ်က မျက်လုံး မှေးတာကိုး)

ပုရွက်ဆိတ်ဝင်နေပြီး မသန့် ရှင်းတော့တဲ့ အဲဒီ့ရေနွေးခွက်ကို ဆက် သောက်သုံးဖို့ က လုံးဝ မဖြစ်နိုင်..

ဒီအကြောင်းအရာက ခက်ခဲတဲ့ အကြောင်းအရာလည်းမဟုတ်

သာမန် ဖြစ်လေ့ဖြစ်ထရှိတဲ့အကြောင်းအရာမျှသာ..

ပြတ်ပြတ်သားသား ရေနွေးတွေသွန်လိုက်ကာ ခွက်ကိုပါ ဆေးလိုက်ပြီး
ရေနွေးအသစ်ထပ်ထည့်ပြီး သောက်ဖို့ ပြင်လိုက်တော့သည်…။

ခုတလော တွေ့ လာရတဲ့ အကြောင်းအရာတွေက သောက်လက်စ ရေနွေးမဟုတ် ပုရွတ်ဆိတ် မဟုတ်ပေမယ့် သောက်နေတဲ့ ရေနွေးခွက်ထဲ ပုရွက်ဆိတ်လာဝင်တဲ့ အကြောင်းအရာမျိုးနှင့် ဆင်တူသည်။

ဘ၀မှာလည်း ဒီလိုမျိုး ကြုံတွေ့ လာတဲ့အခြေအနေတွေဆိုရင် ….
မကောင်းတဲ့ ရေနွေးကို ချက်ခြင်း သွန်ပစ်ပြီး ပြန်ပြီး ဆေးကြောကာ ဒီလိုမျိုးဖြေရှင်းဖို့ သာ ပြင်မိပါတော့သည်။

မြလေးသျှင်
၂၃၊ ၅၊ ၂၀၁၃

Advertisements

စက်ဘီး


ဘဝဆိုတာ စက်ဘီး စီးရသလိုပဲ

ဟန်ချက်ညီညီ ကိုယ့်အားကိုယ်ကိုး နင်းရတယ်

စက်ဘီးစီး မတက်ခင်ကဆို ခဏခဏ ချော်လှဲကျ

စက်ဘီး စီးရင် အဆင်းကို လိမ့်စီးချရတာ အရမ်းကို လွယ်သလောက်

ကုန်းမြင့်ပေါ်ရောက်ဖို့ အားစိုက်နင်းရတာ ပင်ပန်း ခက်ခဲတယ်

ဖြတ်သန်းရတဲ့ ဘဝလမ်းခရီး ဟာ အပြင်မှာတော့

ဖြောင့်ချင် ဖြောင့်မယ်

ကောက်ချင် ကောက်မယ်

ဒီလမ်းတွေကို သီးခံ ဖြတ်သန်းပြီးတော့ လိုရာ ခရီးရောက်အောင်

သွားနေကြတာပဲ မဟုတ်လား …

မြလေးသျှင်
၉  . ၅. ၂၀၁၃

Image Credit : ARTIST I Christian Jequel

 

လွယ်တယ် Vs ခက်တယ်


လွယ်တယ် Vs ခက်တယ်

သူများကို ရူးသလို ပေါသလို လုပ်ရတာ လွယ်တယ်
ကိုယ်က အရူးလုပ်ခံရတာ ခက်တယ်

သူများ အမှားတွေကို ထောက်ပြဖို့  လွယ်တယ်
ကိုယ့် အမှားတွေကိုတော့ ပြန်မြင်ဖို့ က ခက်တယ်

မြင်လိုက် တာ လွယ်တယ်
မှတ်မိဖို့ က ခက်တယ်

ကြားတာ လွယ်တယ်
နားလည်ဖို့က ခက်တယ်

စကားပြောလိုက်ရတာ လွယ်တယ် (အပြောလွယ်တယ် )
လက်တွေ့ လုပ်ရဖို့က ခက်တယ် ( အလုပ် ခက်တယ် )

လူတွေ အယူ လွယ်တယ်
အပေး ခက်တယ်

အောက်ကို ဆင်းတာ လွယ်တယ်
အပေါ်ကို တက်ဖို့ ခက်တယ်

တစ်ယောက်သောသူ ရဲ့ နေရပ် လိပ်စာကို ရဖို့ လွယ်တယ်
သူ့ နှလုံးသားထဲကို ၀င်နေရာယူဖို့ ကတော့ ခက်တယ်

တစ်ယောက်သောသူ ကို နာကျင်ထိခိုက်အောင် လုပ်ဖို့ လွယ်တယ်
အဲဒီ့ဒဏ်ရာကိုတော့ ပြန်ကုစားဖို့ က ခက်တယ်

ကတိပေးဖို့ က လွယ်တယ်
ကတိတည်ဖို့ က ခက်တယ်

အမှားလုပ်ဖို့ က လွယ်တယ်
အမှားတွေထဲက သင်ခန်းစာယူဖို့ က ခက်တယ်

စည်းမျဉ်းတွေ ချမှတ်ဖို့ က လွယ်တယ်
တကယ်တမ်း လိုက်လုပ်ဖို့ ကတော့ ခက်တယ်

အပေါင်းအသင်းများဖို့ လွယ်တယ်
မိတ်ဆွေကောင်းရဖို့ က ခက်တယ်

နေ့ တိုင်း ပျော်ပျော်နေဖို့ က လွယ်တယ်
ဘ၀ကို အဓိပ္ပါယ်တန်ဖိုးရှိရှိ ဖြတ်သန်းနိုင်ဖို့့က ခက်တယ်

ငွေသုံးရ လွယ်တယ်
ငွေရှာရ ခက်တယ်

ညစ်ပတ်ဖို့ လွယ်တယ်
သန့်ရှင်းဖို့ ခက်တယ်

အိုမင်း လွယ်တယ်
နုပျိုဖို့ ခက်တယ်

သဘောထားသေး ကလေးဆန်ရတာမျိုးက လွယ်တယ်
လူကြီးတစ်ယောက်လို တည်ငြိမ်ရင့်ကျက်ဖို့ခက်တယ်

ဘာသာတရားကို ကိုးကွယ်တာ လွယ်တယ်
ဘာသာတရားရဲ့လေးနက်တဲ့အသိကို ရဖို့ တော့ ခက်တယ်

တရားစာပေ အဆုံးအမတွေကို ရှာရတာ လွယ်တယ်
ကိုယ့် စိတ် နဲ့ ခန္ဓာကိုယ်မှာ တရားရှာတွေ့ဖို့ကတော့ ခက်တယ်

Facebook ကြီးမှာ Like နှိပ်ရတာ လွယ်တယ် ( ကလစ်တစ်ချက်တည်း)
Share လုပ်ဖို့က ခက်တယ် ( အနည်းဆုံး ကလစ်နှစ်ချက်နှိပ်ပြီး ကွန်နက်ရှင် ကောင်းမှ ပေါ်လာမှာကိုး)

လွယ်တာနဲ့ ခက်တာကို စဉ်းစားမိတာလေးတွေ ချ ရေးကြည့်တာပါ

မှန်မယ် ထင်တာတွေဆိုရင်. Like ပေးပါနော်

သေချာတွေးလို့ နှစ်သက်မယ်ဆိုရင် Share နိုင်ပါတယ်

ပြောစရာလေးတွေ ရှိပြီး ထပ်ဖြည့်ပြောမယ်ဆိုရင် Comment ပေးကြပါရှင့်

အမှန်တော့ လွယ်တာ နဲ့ ခက်တာ တွေက နေရာတိုင်းရှိနေတက်ကြတာပါ …

တွေးမိသမျှ…

မြလေးသျှင်

၂၇ /၄ / ၂၀၁၃

 

နိုင်ငံရေး ကစားပွဲအပြောင်းအလဲ


သင်္ကြန်တွင်းကြည့်ဖြစ်တဲ့ နိုင်ငံရေးနောက်ခံ ဇာတ်လမ်းလေးတစ်ပုဒ်ပါ

နိုင်ငံရေးဝါသနာပါတဲ့သူတိုင်း မကြည့်မဖြစ် ကြည့်သင့်တဲ့ ဇာတ်လမ်းကောင်းပါ..

ဟိုး ပြီးခဲ့တဲ့ အမေရိက သမ္မတရွေးကောက်ပွဲတုန်းက အဖြစ်အပျက်တွေကို
ဇာတ်လမ်းသဘောမျိုးရိုက်ထားတာပါ..

သမ္မတအိုဘားမားရဲ့ ပြိုင်ဘက် ဂျွန်မက်ကိန်းရဲ့ ဒုသမ္မတလောင်းအဖြစ် အရွေးခံရတဲ့ ဆာရာပဲလင်း (Sarah Palin) ရွေးကောက်ပွဲဝင်တဲ့အကြောင်းတွေ သတင်းထောက်တွေမီဒီယာတွေနဲ့ တွေ့ ဆုံတာတွေကို လှလှပပကြီး ရိုက်ထားပါတယ်..

ဇာတ်လမ်းထဲမှာ ဂျွန်မက်ကိန်းဦးဆောင်တဲ့ နိုင်ငံရေးအဖွဲ့ ဟာ သူ့ ရဲ့ ဒုသမ္မတလောင်း ဆာရာကိုရွေးခဲ့ပြီးတဲ့နောက်မှာမှ သိခဲ့ရတာကတော့

အပြည်ပြည်ဆိုင်ရာ နိုင်ငံတကာရေးရာနဲ့ ပက်သက်တဲ့ ဗဟုသုတတွေမရှိဘဲ
သတင်းမီဒီယာတွေမေးရာမှာ ကောင်းစွာ ဖြေဆိုနိုင်ခြင်း မရှိပါဘူး..

လူထုရှေ့ ကို ထွက်ပြရာမှာတော့ ဆာရာက ဟိတ်ဟန်ကောင်းပြီး စကားအပြောအဆိုကလည်း သွက်ကာ ပါးနပ်စွာတော့ နေပြခဲ့ပါတယ်..

ဂျွန်မက်ကိန်းရဲ့ နိုင်ငံရေး အကြံပေးလည်း
အဆင်းရှိပေမယ့် အချင်းမပြည့်စုံတဲ့ ဆာရာကို တော်တော်စိတ်ကုန်သွားပေမယ့် သူတို့ စလိုက်တဲ့ ဇာတ်လမ်းကို
အဆုံးထိ ကဖို့ ဆုံးဖြတ်လိုက်ပါတော့တယ်-

ဇာတ်လမ်းအသေးစိတ်ကို တော့ “Game Change” ဇာတ်လမ်းလေး မှာ ကြည့်လိုက်ကြရအောင်နော်..

မှတ်ချက်။ ။
ဂျွန်မက်ကိန်းဟာ အိုဘားမားကို ရှုံးခဲ့တာ သူတို့ အဖွဲ့ မှာ ဆာရာကြောင့်လို့  မသုံးသပ်ချင်ပေမယ့် အကြောင်းအရာတစ်ခုအနေနဲ့  ဇာတ်လမ်းထဲက မီးမောင်းထိုးပြခဲ့ပါတယ်။
ဆာရာဟာ လူကြိုက်များလာပေမယ့် ဘက်ဂျက်ကို ပိုသုံးနိုင်ခဲ့တဲ့အိုဘားမားရဲ့ ကြော်ငြာ (campaign)တွေဟာလည်း အိုဘားမားကို အနိုင်ရစေဖို့ အကြောင်းရင်း တစ်ခုပါပဲ..
အဲဒီ့ထဲကမှ ကျွန်မတို့ သုံးနေတဲ့ Facebook တွေ အင်တာနက်တွေ မှာ Online Media အဖြစ် ကြော်ငြာတွေ သုံးစွဲပြီး သေချာလုပ်ခဲ့တဲ့အတွက် နိုင်ခဲ့တယ်လို့ လည်း ကြားမိပါတယ်—

ဇာတ်လမ်းလေးကတော့ စိတ်ဝင်စားဖို့ ကောင်းတဲ့အတွက် ညွှန်းလိုက်ပါတယ်နော်-

အားလုံး ပျော်ရွှင်ငြိမ်းချမ်းပြီးမင်္ဂလာအပေါင်းနဲ့ ပြည့်စုံတဲ့
မြန်မာနှစ်သစ်ဖြစ်ပါစေရှင်

မြလေးသျှင်
14.4.2013

“စားအုန်းဆီ နဲ့ ကြိတ်သား “


စားအုန်းဆီ နဲ့ကြိတ်သား

အခုနောက်ပိုင်းလူတွေ ရောဂါတွေအဖြစ်များပြီး စောစောသေဆုံးတာတွေ များတာတွေ့ရပါတယ်။
စားအုန်းဆီစားတဲ့ လူအရေအတွက်ကို မသိရသေးခင် ပြည်ပမှ မြန်မာပြည်ထဲကို တင်သွင်းတဲ့ နှစ်အလိုက် တိုးလာတဲ့ စားအုန်းဆီပမာဏ မြင်လိုက်ရတော့ အလန့်တကြား ဖြစ်မိပါတယ်။

စားအုန်းဆီတင်သွင်းမှုများလာတာကို ဖော်ပြပါဇယားလေးပုံလေးကိုကြည့်ရင်သိနိုင်ပါတယ်။

Image credit : eTrade Myanmar

စားအုန်းဆီတင်သွင်းတာများလေ လူတွေ စားအုန်းဆီစားလေဆိုတာ ပြောဖို့ တောင်မလိုပါ။
ခက်တာက ကျန်းမာရေးဆိုးဝါးလာတာ မကောင်းတဲ့အတွက်ပါ။
အရင်က အာလူးကြော်တွေကို ရေသန့်ဘူးတွေထည့်ကြော်လို့ ကြားမိတုန်းကလည်း စားရမှာ ခပ်ကြောက်ကြောက်၊
ဇယားထဲမှာ တိုးလာတဲ့ စားအုန်းဆီတန်ချိန်တွေနဲ့ မြန်မာပြည်လူအရေအတွက်ကို ကျန်းမာရေးရူ့ထောင့်ကနေ
ကိန်းဂဏန်း အချိုးများဖြင့် ဆက်တွက်ဖို့လိုနေပါပြီ.
အရင်က တောင်သူလယ်သမားတွေက
မြေပဲတွေ စိုက်ခဲ့တာများပေမယ့် အခုနောက်ပိုင်း မြေပဲတွေသိပ်မစိုက်ဘဲ နိုင်ငံခြားပို့ဈေးကောင်းရတဲ့ ပဲတွေနဲ့တခြားထွက်ကုန်တွေ ပြောင်းစိုက်လို့မြေပဲဆီစစ်စစ်က ဈေးတွေကြီးပြီး ပြည်ပသွင်းကုန်ဖြစ်တဲ့ စားအုန်းဆီဈေးပေါပေါတွေ စားပြီးရောဂါတွေရနေလားလို့
ထမင်းတစ်နပ်ပဲလျော့စားပါ စကားကို မကြားချင်အဆုံးဖြစ်ပေမယ့်
တော်ကြာ စားအုန်းဆီကြောင့် ကျန်းမာရေးထိခိုက်တယ်လို့ ကိုယ်က အငြိမ်မနေနိုင်လို့ဖွမိလျှင်
လူဂျီးမင်းတြားများက ” ရေလုံပြုတ်ပဲ စားကြပါ ” ဟု အမိန့်ထွက်လာရင် အခက်သား.
စားအုန်းဆီစားသုံးမှုနဲ့ ကျန်းမာရေးကတော့
ဘာပဲဖြစ်ဖြစ် ဆက်စပ်မှုတော့ရှိနေပါသည်။

ထို့အတူ နိုင်ငံရဲ့ စီးပွားရေးအရ တွက်ချက်ပြနေတဲ့ ပြည်ပ ပို့ကုန် ( Export) နဲ့
ပြည်ပမှတင်သွင်းကုန် ( Import) တို့အကြောင်းကိုလည်း တွက်ကြည့်လိုက်လျှင် စိတ်ထဲတမျိုးဖြစ်သွားသည်။
ဒီလိုပါ
Super Market တွေ ဈေးဝယ်စင်တာ shopping mall တွေ ဝင်ကြည့်ရင် ပရိဘောဂတွေဘက် စိတ်ဝင်စားလို့ သွားသွားကြည့်မိတဲ့အခါမှာ ဗီဒို စားပွဲခုံ စာအုပ်စင်တွေဟာ လှလှပပစီပြထားပါတယ်
သိပ်ကိုသပ်ရပ်လှပတဲ့ အိမ်ထောင်ပရိဘောဂတွေပဲပေါ့
ဒါပေမယ့် ဒီဟာတွေဟာကြိတ်သားပေါ့
ကြိတ်သားဆိုသည်မှာ သစ်သားတကယ့်အစစ်မှ မဟုတ်တဲ့ အတိုအစ အပိုင်းလေးတွေကို
နည်းပညာလေးသုံးပြီး သစ်သားဟန်ဆောင်ကော်ကပ်ထားသည် မဟုတ်ပါလား
ကြိတ်သားတွေက အမြင်ပန်းတော့လှပေမယ့် ကြာရှည်တော့မခံ

ဒီဟာတွေကို မသုံးဘဲ သစ်သားပရိဘောဂ သုံးရင်ကောင်းမလား တွေးမိပြီး
ပရိဘောဂ သစ်သားတွေလုပ်တဲ့ ဆိုင်တွေဘက်ရောက်တော့ ဝင်မေးကြည့်တော့
သစ်သား ပရိဘောဂဈေးနှင့် ကြိတ်သား ပရိဘောဂဈေးက နှစ်ဆနီးပါး သိသိသာသာကွာနေသည်။
မြန်မာပြည်ထဲမှာ လုပ်တဲ့ ကြိတ်သားတွေလည်း ရှိပါသည်။

အဲဒီ့မှာ ကိုယ်တိုင် စဉ်းစားမိသွားသည်။ဈေးကတော့ ကောင်းရင်ကောင်းသလိုများမည်။
ဒါက နိယာမပဲလေ
ဒါပေမယ့် နောက်တစ်ခါ စဉ်းစားမိပြန်သည်။
ငါတို့က အိမ်နီးချင်းနိုင်ငံတွေကို သစ်လုံးတွေတင်ပို့ပြီး
သူတို့ဘက်က ပြန် တင်သွင်းတဲ့ကြိတ်သားပရိဘောဂတွေ သုံးနေရရင်တော့ .ဆက်တွေးစရာတွေအများကြီးရှိပါသည် ။

အခုစာဖတ်နေသူရော
သစ်သားလား ?
ကြိတ်သားလား ?

သေချာတာကတော့ စားအုန်းဆီကို ကြိတ်သားနှင့် ဘယ်သူကမှတော့ ၀ါးမစား။

သို့ သော်လည်း ကျွန်မတို့ မြန်မာပြည်က လူတွေကတော့ စားအုန်းဆီနှင့် ကြိတ်သားတွေကို တစ်နည်းမဟုတ်တစ်နည်းနည်းဖြင့် စားသုံးသူများ (Consumers) ဖြစ်လာနေကြသည်မို့  အတွေးနယ်ချဲ့မိရင်း….။  ။

မြလေးသျှင်
၁၇/၂/၂၀၁၃

Picture Credit : eTrade Myanmar

“သံသရာ ခရီးသွား “


“သံသရာ ခရီးသွား ”

လူက အရင်လူပဲ…
စိတ်တွေက ပိုပြီး တည်ငြိမ်လာသလိုလို…
အသက်တွေလည်း တစ်နှစ်ပြီးတစ်နှစ်ကြီးလာပြီမို့ 
ခရီးတွေထွက်ဖြစ်ခဲ့ပြီး
ဘလော့တွေဘက်လည်း မလှည့်ဖြစ်
စာရေးစာဖတ်သိပ်နည်းခဲ့ပြီး
လက်တွေ့ ဘ၀ထဲ ကွင်းဆင်းသလိုလိုနဲ့ 
အားနာပါတယ်..
ကျေးဇူးတင်ပါတယ်..
အပြုံးအစစ်အမှန်နဲ့ သာ ပြုံးပြချင်ပါတယ်..
ဓာတ်ပုံရိုက်တိုင်းပြုံးပြနေရလို့ 
ကိုယ့်ဘာသာကိုယ် အတုအစစ် ခွဲခြားမရတဲ့ အဖြစ်
လူကြည့်တိုင်း လှနေဖို့ 
ပြုံးပြနေရတာကိုက
အတုအယောင်များလားလို့ 
ကိုယ့်ကိုကိုယ် တွေးမိရင်း
သံသရာတကွေ့ အမှားမတွေ့ ဖို့ ကို
ဘာပဲဖြစ်ဖြစ် ကြည့်ရှောင်နေရင်း
သံသရာခရီးသွားဆိုတာ
နားလိုက် သွားလိုက်
တစ်နေရာရာမှာတော့
မှတ်တိုင်တစ်ခုခုတော့ သတ်မှတ်ရအုံးမယ် မဟုတ်လား…
ကိုယ်တို့ ဘ၀တွေ ဆိုတာက
မရပ်မနား ခရီးသွားတွေမို့ 
လမ်းမှာဆုံတုန်း အစစ်အမှန်အပြုံးနဲ့  နှုတ်ဆက်ချင်ပါတယ်..

အားလုံးကို “မင်္ဂလာပါ”လို့  ။ ။

မြလေးသျှင်
3.2.2013

သစ်ပင်ခုတ်နေသည့် အတွေးများ



လူတစ်ယောက် သစ်ပင်တစ်ပင်ခုတ်နေတဲ့ ပုံဖြစ်သည်။
ပုဆိန်ဖြင့် သူခုတ်လိုက်တဲ့ သစ်ပင်မှာ သစ်ပင်အပိုင်းအစလေးနှင့်အတူ
သစ်ခုတ်သမားရဲ့ ဦးခေါင်းအရိပ်ပါ ခေါင်းပြုတ်ထွက်သွားသည့်ပုံဖြစ်သည်။
သေချာကြည့်လေ အတွေးပွားစရာများလေ ဖြစ်တော့သည်။
လူက ခုတ်လိုက်တာ သစ်ပင်ကိုပါ
ဘာကြောင့်များ သူ့ ကိုယ်ခန္ဓာရဲ့ အရေးကြီးဆုံး ဦးခေါင်းအရိပ်လေးပါ ပါသွားပါလိမ့်.

သစ်ပင်တစ်ပင်ခုတ် ထောင်သုံးနှစ် ဆိုတဲ့ ဥပဒေအရလည်း အကြမ်းဖျင်းတွေးလို့ ရသည်။

ဂေဟစနစ်ကို အသက်ဆက်ပေးတဲ့ သစ်ပင်ကို ခုတ်လျှင် လူပါအသက်ဘေးအန္တရာယ်
ရှိလာနိုင်တဲ့ အကြောင်းကိုလည်း မီးမောင်းထိုးပြနေတာ နဲ့လည်း တူပါသည်။

နောက်ထပ် အများကြီး ချဲ့ကားတွေးလို့ရတာတွေရှိသေးသည်။
ငွေရှာသူများ
ရာထူးဂုဏ်ရှိန်နောက် လိုက်သူများ
ကိုယ့်ဘဝတက်လှမ်းအောင်မြင်ဖို့ အတွက်
သူတစ်ပါး သစ်ပင်ကို ခုတ်လှဲရန် ကြိုးစားလိုက်သည့် တဒင်္ဂအတွင်းမှာ
မိမိ၏ အရိပ်လိုလိုက်နေတဲ့ ဂုဏ်သတင်း ကိုယ်ကျင့်သိက္ခာနဲ့တူတဲ့ ခေါင်းတစ်လုံးပါ အဆစ်ပျောက်သွားနိုင်ကြောင်း ဒီကာတွန်း သရုပ်ဖော်ပုံလေးက တဆင့် ခံစားမိပါသည်။

ပစ္စည်းပျောက်ရင် ရှာလို့လွယ်ပါသည်။
ကိုယ်ကျင့်တရား ပျောက်သွားခဲ့လျှင် မိမိပုံရိပ်ပါ ပျောက်ကွယ်သွားနိုင်တော့သည်။

ရင်ဘတ်ရှိ နှလုံးသားထဲတွင် ချစ်ခြင်း မေတ္တာတရား ထားရှိရန် လိုအပ်သလို
ဦးနှောက်ထဲ ဝေဖန်ပိုင်းခြားနိုင်သည့် အကန့်လေးများထဲတွင်
မပါမဖြစ် လိုနေသည်မှာ (Ethic) ဟုခေါ်သော လူ့ကျင့်ဝတ်၊ကိုယ်ကျင့်သိက္ခာသာလျှင် ဖြစ်တော့သည်မို့ . . .

မြလေးသျှင်
8. Nov. 2012
Image from Internet

အိုဘားမားကို ဘာလို့ နိုင်စေချင်လဲဆိုရင်


အိုဘားမားကို မြန်မာပြည်သူပြည်သားတွေက ဘာလို့ နိုင်စေချင်လဲဆိုရင်…
အချက်နှစ်ချက်ပဲ ရှိပါတယ်…

တစ်-
ပညတ်သဘောတရားအရ…
အို ဘားမား ဆိုတဲ့ နာမည်မှာ ဘားမားဆိုတဲ့ ကိုယ်တို့ မြန်မာပြည်ရဲ့ နာမည်ရင်း တစ်ခုပါနေလို့  အရင်းနီးဆုံး သူစိမ်းတစ်ယောက်အေ
နနဲ့  သိပ်ကို သဘောကျနေကြလို့ ပါ

နှစ်-
ပရမတ် သဘောတရား အရ…
အိုဘားမား က ပြီးခဲ့တဲ့သက်တမ်းမှာ လက်ရှိနိုင်ငံခြားရေးမူဝါဒတွေအနေနဲ့ ရင်းနီးပြီးသားအပြင် မြန်မာပြည်ကို လာလည်မယ်လို့ ပြောခဲ့ဖူးပါတယ်…

ဒါကြောင့်ပါ အိုဘားမားကို ကြိုဆိုမိတာပါ…

ထပ်မံအရွေးခံရလို့ တကယ် ၀မ်းမြောက်ဝမ်းသာ ဂုဏ်ယူပါတယ် Mr. Obama !

မြလေးသျှင်
{၇.၁၁.၂၀၁၂}

စိန်ဝယ်ရာတွင် မပါမဖြစ် စမ်းစစ်ရမည့် 4 C’S ….


စိန်ကောင်းဝယ်ဖို့  အရေးပါတဲ့ အချက်လေးချက်ရှိပါတယ်..အင်္ဂလိပ်လို အတိုကောက်ကတော့ မှတ်သားဖို့ လွယ်တဲ့
(4 C ) လို့ ခေါ်တဲ့ စီလေးလုံးပါ…။

စိန်တွေရဲ့ တန်ဖိုးအဆင့်ကို ဒီဇယားလေးထဲမှာသတ်မှတ်ပေးထားပါတယ်။

(၁) Carat လို့ ခေါ်ကြတဲ့ စိန်ရဲ့ အလေးချိန် (Weight) အရွယ်အစားပါ

စိန်မှာ အရပ်စကားနဲ့ ပြောလျှင် တစ်လုံးစီး၊ နှစ်လုံးစီး၊ သုံးလုံးစီး အစရှိသဖြင့် အလေးချိန်ပေါ်မူတည်ပြီး စိန် တစ်ပွင့် သို့ မဟုတ် စိန်တွေရဲ့ ကာရက်အဖြစ် သတ်မှတ်ပြီး တန်ဖိုးသင့်ကြပါတယ်။ စိန်တစ်ပွင့်အရွယ်က ခုနှစ်လုံးစီးဆိုလျှင် ဈေးချိုပြီး တစ်လုံးစီးဆိုလျှင် သူ့ ထက် အဆပေါင်းများစွာ ဈေးကြီးနေတော့သည်။ သို့ ပေမယ့် စိန်ဈေးကို အရွယ်အစား (C) တစ်မျိုးတည်းဖြင့်လည်း ဆုံးဖြတ်လို့ မရပါ။ စိန်ပွင့်ကသာ အရွယ်အစားကြီးပေမယ့် အပြစ်အနာအဆာပါပြီး သွေးပုံသွေးနည်းကလည်း မကောင်းဘဲ အရောင်ဝါတဲ့ စိန်မျိုးဆိုလျှင်တော့ ဈေးချိုပေလိမ့်မည်။ C လေးမျိုးတို့ နဲ့ ဆုံးဖြတ်မှသာလျှင် စိန်တန်ဖိုး တစ်စုံတရာ ပေါ်လွင်မည် ဖြစ်ပါသည်။

(၂) Clarity ဆိုတဲ့ စိန်ရဲ့ သန့် ရှင်းမှု…

( ဒီနေရာ မှာ အရေးကြီးဆုံးအချက်က သာမန်မျက်စိနဲ့ မမြင်နိုင်တဲ့ စိန်ရဲ့ အပြစ်အနာအဆာတွေပါပဲ… စိန်တစ်ပွင့်ကို ရုတ်တရက်ကြည့်လိုက်ရင် ပြိုးပြိုးပြက်ပြက်အရောင်တွေက အရမ်းတောက်ပြီး
ဖြူဖြူဖွေးဖွေးနဲ့ သိပ်ကိုလှလို့  အပြစ်အနာအဆာ သိပ်ကင်းတယ်လို့  မထင်လိုက်ပါနဲ့ ..။ မှန်ဘီလူးနဲ့ တင်တောင် မဟုတ်၊ စိန်ကြည့်တဲ့ Microscope ခေါ်တဲ့ အနုစိတ်မှန်ဘီလူးနဲ့  အသေးစိတ် သေချာကြည့်တော့မှ စိန်တွေမှာ အက်ရာ ပါ မပါ၊ အစက် အပြောက် ရှိမရှိ မြင်တွေ့ နိုင်လို့ ပါ။ လူတွေမှာ အပြစ်အနာအဆာ ကင်းတဲ့လူရှားသလို စိန်တွေမှာလည်း အစက်အပြောက် အပြစ်အနာ အနည်းအများ ရှိတက်ကြပါတယ်။
စိန်မှာအပြစ်အနာပါ မပါ အစက်အပြောက် ဘယ်လောက်ဆိုတာ သတ်မှတ်ထားတာကို ဒီပုံလေးမှာ မြင်နိုင်ပါတယ်။

စိန်တစ်ပွင့်ဟာ အပြစ်အနာနည်းလေ သေးလေ သူ့ တန်ဖိုးဟာ ကြီးလေ ပါပဲ။
တန်ဖိုးကြီး စိန်ပွင့်များကို ၀ယ်ယူမည့်သူတစ်ယောက်ဟာ နားလည်တက်ကျွမ်းတဲ့သူနဲ့ ပြဖို့ လိုအပ်တာ အမှန်ပါ။

(၃) Color လို့ ခေါ်ဝေါ်တဲ့ စိန်ရဲ့ အရောင်အဆင်း

စိန်နဲ့ ပက်သက်လာလျှင် အရောင်မှာလည်း မပါမဖြစ် အရေးပါနေပြန်သည်။ ကျွန်မငယ်ငယ်တုန်းက ကလေးအတွေးမျိုးဆိုလျှင် စိန်က အဖြူရောင်ပဲ ၊ ဘာအရောင်မှ မရှိဘူး ဟု အလွယ်တကူ မှတ်လိုက်ရုံဖြင့် ရနိုင်သော်လည်း တကယ်တမ်းတော့ စိန်မှာ အဖြူရောင်သန်းနေရုံနဲ့  ဖြူသည်ဟု မယူဆနိုင်၊ စိန်တွေရဲ့ အရောင်ကို သေချာစမ်းသပ်ပြီး အရောင်ကို ခွဲခြားကြည့်လိုက်ပါက သဘာဝအတိုင်း အရောင်မဲ့ (သို့ ) အဖြူရောင် မှ အ၀ါရောင်ဖျော့အထိ ရှိတက်လေသည်။ စိန်တွေမှာ အရောင်အားဖြင့် ပယင်းရောင်၊ အစိမ်းရောင်၊ အပြာရောင် အစရှိသဖြင့်အရောင်မျိုးစုံရှိတဲ့ စိန်တွေလည်း ရှိပါတယ်။
အဲသည်လို ရှားပါးတဲ့အရောင်ရှိလို့  ဆန်းကြယ်မှုတစ်ရပ်အနေဖြင့် လူတွေက ဈေးကြီးပေး ၀ယ်တက်ကြပါတယ်။

စိန်တွေထဲမှာ Colorless လို့ ခေါ်တဲ့ ဖြူဆွတ် အရောင်ရှိတဲ့ စိန်ဟာ တန်ဖိုး အကြီးဆုံးပါပဲ ။ စိန်ရဲ့ အရောင်ကို ရည်ညွှန်းတဲ့နေရာမှာ
ABC ကနေ မစဘဲ D ကနေစပြီး D,E,F ကနေ S-Z ဆိုပြီး ခွဲခြားထားပါတယ်။

D,E,F အဆင့်တွေမှာ အရောင်မဲ့စိန်လို့ သတ်မှတ်ထားပြီး O,P,Q,R အဆင့်တွေက အရောင်သန်းတဲ့ စိန် အဖြစ် ဖော်ပြပါတယ်။ X,Y,Z+ ဘက်ရောက်ရင်တော့ အရောင်ရှိတဲ့ စိန်ဖြစ်သွားပါပြီ ဟု ဆိုကြပါတယ်။

(၄) Cut ဟုခေါ်သော စိန်သွေးပုံသွေးနည်း
စိန်တွေရဲ့ အလှကို ပေါ်ထွက်လာအောင် လုပ်နိုင်တဲ့ အရာတစ်ခုကတော့ စိန်သွေးပုံသွေးနည်းပါ။ ရှေးစိန်တွေဆိုရင် သိပ်အရောင်မထွက်ဘဲ ခပ်တုံးတုံးကြီးဖြစ်နေခြင်းမှာ စိန်သွေးပုံသွေးနည်းများ ကွာခြားနေသလားဟု ထင်မှတ်မိသည်။ စိန်တွေကို ကြည့်လိုက်လျှင် မှန်ကွက်ဟု ခေါ်သော (Table facet) တွေကလည်း အများကြီး၊ စိန်ပွင့်ရဲ့ ပယ် (Crown) နှင့် ချွန်း (Pavilion) တို့ ကလည်း အချိုးအစား တိကျမှန်ကန်ဖို့ လိုအပ်ပါသေးတယ်။ စိန်ကို အချိုးကျကျသွေးနိုင်ဖို့ ကျွမ်းကျင်တဲ့ စိန်သွေးဆရာ လိုအပ်ပါတယ်။
‘S ကတော့ Shape ဆိုတဲ့ စိန်ရဲ့  ပုံပန်းသဏ္ဍန်ဖြစ်တဲ့အတွက် Cut ထဲမှာ ပါ ပါတယ်။
အရေးကြီးတဲ့ စီလေးမျိုးပြီးရင်တော့ အလွယ်တကူမှတ်သားနိုင်တဲ့ S ကတော့ (Shape ) ဆိုတဲ့ စိန်ရဲ့  ပုံပန်းသဏ္ဍန်ပါ။ စိန်ကိုသွေးတဲ့နေရာမှာ အရွယ်ပုံစံလိုက်ပြီးပြောင်းလဲနိုင်တဲ့ အ၀ိုင်းပုံစံ၊ ဘဲဥပုံစံ၊ လေးထောင့်ပုံစံ၊ မိုးစက်ပုံစံ၊ အသဲပုံသဏ္ဍန် စသည့်ဖြင့် စိန်ရဲ့  ပုံပန်းသဏ္ဍန်တွေ ကွဲပြားနိုင်ပါတယ်။ များသောအားဖြင့် အ၀ိုင်းပုံစံသာ သွေးလေ့ရှိပါတယ်။

ဝယ်ယူမယ့် စိန်ပွင့်ကြီးလေ တန်ဖိုးများလေ ဖြစ်သလို သေချာစမ်းစစ်ကြည့်ရမည့် အချက်တွေကလည်း များပါတယ်။ စိန်ကောင်းတစ်ပွင့်တန်ဖိုးကို ကျွမ်းကျင်သူတွေနဲ့  တန်ဖိုးဖြတ်စစ်ဆေးကြည့်မှသာ ပိုပြီး ထိရောက်နိုင်မှာဖြစ်ပါတယ်။  ဒါကြောင့်လည်း ဈေးကွက်ထဲမှာ အရည်အသွေးသတ်မှတ်ပြီးသား (Certificate) လက်မှတ်ပါတဲ့ စိန်တွေရဲ့တန်ဖိုးဟာ ကြီးမြင့်နေတော့တာဖြစ်ပါတယ်။

မြလေးသျှင်

ကိုးကား ။ ။ မောင်ဝင်းမြတ် – ရတနာမြတ်ရှု

ပုံရိပ်အင်္လကာ


ကိုယ်တို့ တွေ
အချိန်မရလို့ စကားတွေအများကြီးမပြောဖြစ်တဲ့အခါ
အချိန်မပေးနိုင်လို့  စာတွေအများကြီး မရေးဖြစ်တဲ့အခါ
ဓာတ်ပုံလေးတစ်ပုံက သူ့ အစားပြောပေးနိုင်လိမ့်မယ် ထင်ပါတယ်..

“ပန်းချီဆိုတာ တိတ်ဆိတ်တဲ့ ကဗျာ
ကဗျာဆိုတာ စကားပြောတဲ့ ရုပ်ပုံ…”
(ဆီမိုနိက်စ်) က ဆိုခဲ့ပါတယ်…

“Painting is silent poetry, and
poetry is painting that speaks.” Simonides

(ဆီမိုနိက်စ်) က တိုတိုလေး ပြောခဲ့ပေမယ့်
သူ့ စကားလုံးတွေက လေးနက်ပြီး အင်မတန် နှစ်သက်ဖို့ ကောင်းပါတယ်…

ဗဂျီအောင်စိုးက စာမဲ့ကဗျာဆိုပြီး သူ့ ပန်းချီတွေကို တင်စားခဲ့တယ်..
ကဗျာတွေမှာလည်း စာလုံး (fonts) တွေနဲ့ အလှဆင်ပြီး ပုံရိပ်အသွင်နဲ့ ပေါ်လာကြပါတယ်

တခါတလေ စာသားတွေအများကြီး မရေးဘဲ
စာသားတိုတိုနဲ့  ကဗျာချိုချိုလေးတွေ တည်ဆောက်ဖို့ ကြိုးစားကြည့်တဲ့အခါ အတော်ပျော်ဖို့ ကောင်းပါတယ်..

ပန်းချီဆွဲတဲ့အခါမှာလည်း ကိုယ့်အတွေးနဲ့ ကိုယ်
တိတ်တိတ်လေး စိတ်ငြိမ်စွာ ဆွဲနေရတာကိုလည်း နှစ်သက်နေမိတယ်..

ဘ၀ဆိုတာ တိုပါတယ်…
ချိုချိုလေးပဲ ဖြတ်သန်းလိုက်ကြရအောင်
ဆီးချိုတော့ မဖြစ်စေနဲ့ ပေါ့…   (ကိုယ့်ကိုကိုယ်သတိပေးရင်း…)

ခါးသီးလာခဲ့ရင်တော့ ဆေးဖြစ်ဝါးဖြစ်ပေါ့..
အခါးဆိုတာကလည်း ဆေးဖက်ဝင်ပါတယ…( ဖြေသိမ့်ရင်းနဲ့ …)

နေ့ မှာ အလင်းပေးတဲ့ နေမင်းကို ကျေးဇူးတင်သလို
လမင်းတစ်စင်းကိုလည်း မှတ်မှတ်ရရ ပြုံးပြီး ကြည့်နေတက်တာ
ကိုယ့်အကျင့်ပါပဲ

တိမ်တိုက်တွေ လွှင့်မျောနေတာက ရင်ကို တိတ်တိတ်လေး တိုးဝှေ့ လာတဲ့  ပန်းချီကားလိုပါပဲ

ဘ၀ ဆိုတာကလည်း အသက်ရှင်နေတဲ့ ကဗျာတစ်ပုဒ်ပေါ့…..။    ။

မြလေးသျှင်
၂.၁၀.၂၀၁၂